ማህበራዊ አባሪ v1.3

ይህ ሰነድ ስለ ምንድን ነው?

ይህ አባሪ በሬንፎረስት አሊያንስ ስታንዳርዶች እና በሬንፎረስት አሊያንስ የአቅርቦት ሰንሰለት መስፈርቶች ውስጥ በሚገኘው ማህበራዊ ምዕራፍ ላይ የተካተቱ ተጨማሪ አስገዳጅ ይዘቶችን የያዘ ነው።

ይህ ሰነድ የሚከተሉትን ያጠቃልላል፦

• የሬንፎረስት አሊያንስ የማስተካከያ ፕሮቶኮል አጠቃላይ እይታ።

• የነፃ፣ ቀድሞ የሚሰጥ እና በቂ መረጃ ላይ የተመሠረተ ስምምነት (FPIC) ሂደት አጠቃላይ እይታ።

• ለዘላቂነት ያለው ግብርና ስታንዳርድ የሚያገለግል የሕፃናት ጉልበት ብዝበዛ እና የግዳጅ ሥራ ስጋት ካርታዎች መረጃ።

• ለዘላቂነት ያለው ግብርና ስታንዳርድ የሚያገለግል በእያንዳንዱ ሀገር የኑሮ ደመወዝ መነሻዎች መረጃ።

ይህንን ሰነድ መቼ እና እንዴት መጠቀም ይቻላል?

ይህ ሰነድ ለሰርቲፊኬት ባለቤትዎች (CH) እና ለሰርቲፊኬሽን አካልዎች (CB) የተካተቱ መስፈርቶችን እና አፈጻጸማቸውን በተመለከተ ተጨማሪ ዝርዝሮችን ይሰጣል። ሰነዱ በሦስት ክፍሎች የተከፈለ ነው፦

• ከእርሻ ስታንዳርዶች እና ከአቅርቦት ሰንሰለት መስፈርቶች የተወሰዱ መሠረታዊ መስፈርቶች።

• ከእርሻ ስታንዳርዶች የተወሰዱ መሠረታዊ መስፈርቶች።  

• ከዘላቂነት ያለው ግብርና ስታንዳርድ ብቻ የተወሰዱ መስፈርቶች።

የመጀመሪያው ክፍል ለሁሉም የእርሻ ስታንዳርዶች እና ለአቅርቦት ሰንሰለት መስፈርቶች ተፈጻሚ የሚሆኑ መስፈርቶችን ይዟል። መሠረታዊ መስፈርቶች ለሁሉም የእርሻ ስታንዳርዶች ተፈጻሚ ይሆናሉ። ከዘላቂነት ያለው ግብርና ስታንዳርድ ክፍል የተወሰዱ መስፈርቶች ደግሞ ለዚህ ስታንዳርድ ብቻ ተፈጻሚ የሚሆኑ ልዩ እና ቀጣይነት ያለው ማሻሻያ መስፈርቶችን ያካትታል።

ከእትም 1.1 ወደ እትም 1.2 የተደረጉ ለውጦች

ከእርሻ ስታንዳርዶች እና ከአቅርቦት ሰንሰለት መስፈርቶች የተወሰዱ መሠረታዊ መስፈርቶች።

ይህ ክፍል የሬንፎረስት አሊያንስ ዘላቂነት ያለው ግብርና ስታንዳርድ (SAS)፣ የተሃድሶ ግብርና ስታንዳርድ (RAS) እና የሬንፎረስት አሊያንስ የአቅርቦት ሰንሰለት መስፈርቶች ተጓዳኝ መሠረታዊ መስፈርቶችን ተግባራዊ ለማድረግ የሚያግዙ ተጨማሪ ዝርዝሮችን ይሰጣል።

1. የሬንፎረስት አሊያንስ የማስተካከያ ፕሮቶኮል

ከመሠረታዊ መስፈርቶች 1.5.1፣ 1.6.2፣ 5.1.4 እና ከአቅርቦት ሰንሰለት መስፈርቶች 1.4.1 እና 4.1.4 ጋር የተያያዘ።

ይህ ክፍል የሬንፎረስት አሊያንስ የማስተካከያ ፕሮቶኮልን የሚገልጽ ሲሆን፣ ሁሉም የሰርቲፊኬት ባለቤቶች የሕፃናት ጉልበት ብዝበዛ፣ የግዳጅ ሥራ፣ አድልዎ፣ በስራ ቦታ የሚፈጸም ጥቃት እና ትንኮሳ ጉዳዮችን ውጤታማ በሆነ መንገድ ለማስተካከል መከተል ያለባቸውን የግዴታ እርምጃዎች ያብራራል።

አንድ ጉዳይ ተለይቶ ታውቆ፣ ተመርምሮ ሲረጋገጥ፣ የሰርቲፊኬት ባለቤት አስተዳደር የማስተካከያ ፕሮቶኮል ወዲያውኑ ተግባራዊ መደረጉን ማረጋገጥ አለበት።

በፕሮቶኮል መሠረት የማስተካከያ ተግባራትን እንዴት ተግባራዊ ማድረግ እንደሚቻል የሚረዱ ተጨማሪ አማራጭ እርምጃዎች እና መመሪያዎች በሬንፎረስት አሊያንስ መመሪያ S፦ የማስተካከያ ፕሮቶኮል ውስጥ ይገኛሉ።  

1.1 የማስተካከያ ሥርዓት መዘርጋት

የሚከተሉት እርምጃዎች በመጀመሪያ የማስተካከያ ሥርዓት በመዘርጋት ለውጤታማ መፍትሔ ለመዘጋጀት የሚያገለግሉ ናቸው።  

1.1.1 ኃላፊነት ያለባቸውን አካላት መመደብ

ለእርሻ የሰርቲፊኬት ባለቤቶች፣ አመራር ለቅሬታ አፈታት ሥርዓት፣ ለመገምገም እና መፍትሄ መስጠት እና ለሥርዓተ ጾታ እኩልነት ኃላፊነት ያለባቸውን አንድ ወይም ከዚያ በላይ ኮሚቴዎችን ይመድባል።  ለቡድን ሰርቲፊኬሽን፣ ለመገምገም እና መፍትሄ መስጠት እና ለሥርዓተ ጾታ እኩልነት በኮሚቴ(ዎች) ፋንታ አመራሩን የሚወክል እና የመወሰን ስልጣን ያለው ኃላፊ ሊመደብ ይችላል።

ለአቅርቦት ሰንሰለት የሰርቲፊኬት ባለቤቶች አመራር ለቅሬታ አፈታት ሥርዓት እና ለመገምገም እና መፍትሄ መስጠት ኃላፊነት ያለባቸውን ኮሚቴ(ዎች) ይመድባል።

1.1.2 የማስተካከያ ዕቅድ ዝግጅት

ሬንፎረስት አሊያንስ የሰርቲፊኬት ባለቤቶች በማስተካከያ ዕቅዳቸውን በአመራር ዕቅዳቸው ውስጥ እንዲያካትቱ ይፈልጋል፤ ይህም ጉዳዮች ሲታወቁ ፈጣን ምላሽ ለመስጠት ያስችላል። የማስተካከያ ዕቅድ ለማዘጋጀት የሚረዱ እርምጃዎች ከዚህ በታች ተዘርዝረዋል።

ባለድርሻ አካላትን መለየት

ለመገምገም እና መፍትሄ መስጠት ኃላፊነት/ያለባቸው ኮሚቴዎች ሰዎች ለማስተካከያ ሂደት ሚና ሊኖራቸው የሚችሉ እንደ ማህበረሰብ መሪዎች፣ የሴቶች ድርጅቶች፣ የወጣቶች ክለቦች፣ የመንግስት ተቋማት፣ መንግስታዊ ያልሆኑ ድርጅቶች (NGOs) እና የሰብአዊ መብት ድርጅቶች ያሉ የውስጥ እና የውጭ ባለድርሻ አካላትን መለየት አለባቸው።  

የሬንፎረስት አሊያንስ መመሪያ S ይመልከቱ፦ አግባብነት ያላቸው የውጭ ባለድርሻ አካላትን እንዴት መለየት እንደሚቻል ምሳሌ ለማግኘት የማስተካከያ ፕሮቶኮል።

የማስተካከያ ዕቅድ ማዘጋጀት

የማስተካከያ ዕቅዱ የሚዘጋጀው በመገምገም እና መፍትሄ መስጠት ኮሚቴ/ኃላፊነት ባለበት ሰው ሲሆን፣ ለእርሻ የሰርቲፊኬት ባለቤቶች በሥርዓተ ጾታ ኮሚቴ/ኃላፊነት ባለበት ሰው ድጋፍ ይደረግለታል፤ እና ለአቅርቦት ሰንሰለት የሰርቲፊኬት ባለቤቶች ደግሞ በመገምገም እና መፍትሄ መስጠት ኮሚቴ/አመራር ተወካይ ይዘጋጃል።

ዕቅዱ የተረጋገጠ ጉዳይን ለማስተካከል መተግበር ያለባቸውን ተግባራት የሚያብራራ ሲሆን፣ የሚሳተፉ ባለድርሻ አካላትን ይለያል። ለእያንዳንዱ ተግባር፣ ዕቅዱ መቼ እና የት እንደሚከናወን፣ የሚጀምርበትን እና የሚያበቃበትን ቀን፣ እንዲሁም ኃላፊነት ያለባቸውን አካላት በግልጽ መለየት አለበት። የዕቅዱ አፈጻጸም ክትትል ሊደረግበት እና ሂደቱም በሰነድ መመዝገብ አለበት።

የሬንፎረስት አሊያንስ መመሪያ S ይመልከቱ፦ ለማስተካከያ ዕቅድ ምሳሌ የሚሆን ቅጽ ለማግኘት የማስተካከያ ፕሮቶኮል።

ስልጠና እና ግንዛቤ ማስጨበጥ  

የማስተካከያ ዕቅዱ አንዴ ከተዘጋጀ በኋላ፣ የኮሚቴ(ዎች) አባላት የአመራር ተወካዩን ጨምሮ፣ ሊፈጠር የሚችል ጉዳይ ሲታወቅ ወይም ሪፖርት ሲደረግ ስላላቸው ተጓዳኝ ሚና ስልጠና ሊሰጣቸው ይገባል።

የቡድን አባላት/ሰራተኞች ወይም ተቀጣሪዎች ስለ የቅሬታ አፈታት ሥርዓት እና የማስተካከያ ፕሮቶኮል፣ ስለ መብቶቻቸው እና እንዴት ማስተካከያ ማግኘት እንደሚችሉ ግንዛቤ ሊሰጣቸው ይገባል።

1.2 አንድ ጉዳይ ሲከሰት፦ የምላሽ እና የማስተካከያ ሂደት

የሚከተለው ሰንጠረዥ ለሕፃናት ጉልበት ብዝበዛ፣ ለግዳጅ ሥራ፣ ለአድልዎ፣ በሥራ ቦታ የሚፈጸም ጥቃት እና ትንኮሳ ጉዳዮች ምላሽ ለመስጠት እና ለማስተካከል የሚያስፈልጉ የቅሬታ እና የማስተካከያ እርምጃዎችን፣ ደረጃዎችን፣ የጊዜ ገደቦችን እና ኃላፊነት ያለባቸውን አካላት ይዘረዝራል።

በተወሰኑ ጉዳዮች ላይ፣ በቂ ምክንያት ሲቀርብ ሬንፎረስት አሊያንስ ከተቀመጠው የጊዜ ሰሌዳ ውጭ እንዲሠራ ፈቃድ ሊሰጥ ይችላል።

የግዴታ እርምጃዎችን እንዴት ተግባራዊ ማድረግ እንደሚቻል የሚረዱ ተጨማሪ አማራጭ እርምጃዎች እና መመሪያዎች በሬንፎረስት አሊያንስ መመሪያ S፦ የማስተካከያ ፕሮቶኮል ውስጥ ይገኛሉ።

የእርሻ ስታንዳርዶች መሠረታዊ መስፈርቶች

ይህ ክፍል የሬንፎረስት አሊያንስ ዘላቂነት ያለው ግብርና ስታንዳርድ (SAS) እና የተሃድሶ ግብርና ስታንዳርድ (RAS) ተጓዳኝ መሠረታዊ መስፈርቶችን ተግባራዊ ለማድረግ የሚረዱ ተጨማሪ ዝርዝሮችን ያቀርባል።

2. ነፃ፣ ቀድሞ የሚሰጥ እና በቂ መረጃ ላይ የተመሠረተ ስምምነት (FPIC) ሂደቶች

ከመሠረታዊ መስፈርቶች 5.8.1 እና 5.8.2 ጋር የተያያዘ

የሬንፎረስት አሊያንስ ስታንዳርዶች መስፈርት 5.8.1 እንደሚደነግገው፤ የትላልቅ እና በግል ሰርቲፋይድ የሆኑ እርሻዎች አመራር የነባር ሕዝቦችን እና የአካባቢ ማህበረሰቦችን ሕጋዊ እና ባህላዊ መብቶች ማክበር አለበት። ከፍተኛ የጥበቃ እሴት (HCV) 5 እና 6 ያሉባቸውን አካባቢዎች ጨምሮ፣ የነባር ሕዝቦችን እና የአካባቢ ማህበረሰቦችን የመሬት ወይም የሀብት አጠቃቀም መብቶች ወይም የጋራ ጥቅሞች የሚነኩ ተግባራት የሚከናወኑት ነፃ፣ ቀድሞ የሚሰጥ እና በቂ መረጃ ላይ የተመሠረተ ስምምነት (FPIC) ካገኙ በኋላ ብቻ ነው።

በመስፈርት 5.8.2 መሠረት፣ ነባር ሕዝቦች እና/ወይም የአካባቢ ማህበረሰቦች ከመሬት አጠቃቀም መብት ጋር በተያያዘ ከአምራቹ ጋር ክርክር ካላቸው፣ ትላልቅ እርሻዎች እና በግል ሰርቲፋይድ የሆኑ እርሻዎች መሬቱን ለመጠቀም ሕጋዊ መብት እንዳላቸው ለማሳየት ከሚያደርጓቸው ተግባራት አካል በመሆን የFPIC ሂደትን መከተል አለባቸው።

ይህ ክፍል የFPIC ሂደት የግዴታ እርምጃዎችን ይዟል። የFPIC ሂደትን እንዴት ተግባራዊ ማድረግ እንደሚቻል የሚረዱ መመሪያዎች እና ምሳሌዎች በሬንፎረስት አሊያንስ መመሪያ T፦ ነፃ፣ ቀድሞ የሚሰጥ እና በቂ መረጃ ላይ የተመሠረተ ስምምነት (FPIC) ሂደቶች ውስጥ ይገኛሉ።  

2.1 ተፈጻሚነት

2.1.1 የFPIC ሂደት የሚያስፈልግባቸው ፕሮጀክቶች ወይም ተግባራት

የሚከተሉት ተግባራት ከታቀዱ እና በነባር ሕዝቦች ወይም በአካባቢ ማህበረሰቦች መብቶች፣ መሬት፣ ሀብቶች፣ ግዛቶች፣ መተዳደሪያ ወይም የምግብ ዋስትና ላይ ጎጂ ተጽዕኖ ሊያሳድሩ የሚችሉ ከሆነ ነፃ፣ ቀድሞ የሚሰጥ እና በቂ መረጃ ላይ የተመሠረተ ስምምነት (FPIC) ያስፈልጋል። ፕሮጀክቱ ወይም ተግባሩ የሚከተሉትን የሚያከናውን ከሆነ FPIC ያስፈልጋል፦

1. ግብርና ያልሆነን መሬት ወደ የሰብል ምርት መለወጥ።

2. በዋናነት ለዕለት ፍጆታ ወይም ለአካባቢ ተጠቃሚዎች የሚውል አነስተኛ የእርሻ መሬትን ከአካባቢው ውጭ ለሚደረግ ንግድ እና ፍጆታ ለሚውሉ ሰብሎች ማልሚያነት መለወጥ።

3. ባህላዊ የግጦሽ መሬቶችን የቀድሞውን የግጦሽ ተግባር ወደሚያስቀሩ ወይም ወደሚቀንሱ ሌሎች የግብርና መሬት አጠቃቀሞች መለወጥ።

4. በአቅራቢያ ወይም በታችኛው ተፋሰስ ለሚገኙ ሌሎች የሰው ልጅ ተጠቃሚዎች የውሃ አቅርቦትን በከፍተኛ ሁኔታ በሚቀንስ ደረጃ በአንድ አካባቢ ያለውን የውሃ አጠቃቀም መጨመር።

5. የአካባቢው ሕዝቦች ወይም ማህበረሰቦች ወደ ተፈጥሯዊ ሥነ-ምህዳሮች ወይም ለምግብ፣ ለቃጫ፣ ለነዳጅ፣ ለመድኃኒት ወይም ለሌሎች ምርቶች የሚውሉ እፅዋትን ወይም ክፍሎቻቸውን ለማደን፣ ለአሳ ማጥመድ ወይም ለማውጣት ለሚጠቀሙባቸው ሌሎች አካባቢዎች ያላቸውን ተደራሽነት ማስቀረት ወይም መቀነስ።

6. የአካባቢው ሕዝቦች ለባህላዊ ወይም ለሃይማኖታዊ ተግባራት በሚጠቀሙባቸው አካባቢዎች ወይም አቅራቢያ የሚከናወን ከሆነ ወይም በሚከተሉት ትርጓሜዎች መሠረት ከፍተኛ የጥበቃ እሴት (HCV) ተብለው የተፈረጁ ቦታዎች ከሆኑ፦

HCV5፦ ከአካባቢ ማህበረሰቦች ወይም ከነባር ሕዝቦች ጋር በሚደረግ ተሳትፎ የተለዩ እና ለአካባቢ ማህበረሰቦች ወይም ለነባር ሕዝቦች መሠረታዊ ፍላጎቶችን ለማሟላት (ለመተዳደሪያ፣ ለጤና፣ ለሥርዓተ ምግብ፣ ለውሃ ወዘተ) ወሳኝ የሆኑ ቦታዎች እና ሀብቶች።

HCV6፦ ዓለም አቀፋዊ ወይም አገራዊ ባህላዊ፣ አርኪኦሎጂያዊ ወይም ታሪካዊ ፋይዳ ያላቸው ቦታዎች፣ ሀብቶች፣ መኖሪያዎች እና መልክዓ ምድሮች፣ እንዲሁም ለአካባቢ ማህበረሰቦች ወይም ለነባር ሕዝቦች ባህላዊ፣ ሥነ-ምህዳራዊ፣ ኢኮኖሚያዊ ወይም ሃይማኖታዊ/ቅዱስ ጠቀሜታ ያላቸው ናቸው። እነዚህም ከእነዚህ የአካባቢ ማህበረሰቦች ወይም ነባር ሕዝቦች ጋር በሚደረግ ምክክር ይለያሉ።  

ከዚህ በታች የተዘረዘሩት እርምጃዎች የFPIC ሂደት እንዴት መከናወን እንዳለበት ያብራራሉ። ደረጃ 1 (ወሰን መለየት) በሁሉም የFPIC ሂደቶች ውስጥ አስፈላጊ ነው። በደረጃ 1 ውጤቶች ላይ በመመስረት፦

1. የታቀዱት ፕሮጀክቶች ወይም ተግባራት የነባር ሕዝቦችን እና የአካባቢ ማህበረሰቦችን መብቶች የማይቀንሱ ከሆነ፣ አመልካቹ መስፈርት 5.8.1ን እንዳሟላ ይቆጠራል።

2. የታቀዱት ፕሮጀክቶች ወይም ተግባራት የነባር ሕዝቦችን ወይም የአካባቢ ማህበረሰቦችን የመሬት ወይም የሀብት አጠቃቀም መብቶች ወይም የጋራ ጥቅሞች (HCV 5 ወይም 6ን ጨምሮ) የሚቀንሱ ከሆነ፣ አመልካቹ መስፈርቱን እንዳሟላ የሚቆጠረው በክፍል 4.2 (የFPIC ሂደትን ማከናወን) ስር ያሉ ከደረጃ 2 እስከ 6 ያሉት እርምጃዎች ተፈጻሚ ሲሆኑ ብቻ ነው።

2.1.2 የFPIC ሂደት የማይፈልጉ የሥራ ክንውኖች

እስከ ሰኔ 1፣ 2012 ዓ.ም. ድረስ ሕጋዊ የሬንፎረስት አሊያንስ ሰርቲፊኬት የነበራቸው እና የFPIC ሂደት የሚጠይቁ ማናቸውንም ፕሮጀክቶች ወይም ተግባራት (ከላይ በተገለጸው መሠረት) ለማከናወን ወይም ከሰኔ 1፣ 2012 ዓ.ም. በኋላ የሰርቲፊኬሽን ወሰን ለማስፋፋት ዕቅድ የሌላቸው ሰርቲፋይድ የሥራ ክንውኖች፤ የ2017 የሬንፎረስት አሊያንስ ዘላቂነት ያለው ግብርና ስታንዳርድ ዋና መስፈርት 4.20ን በማሟላታቸው መስፈርት 5.8.1ን እንዳሟሉ ይቆጠራሉ።

ከሰኔ 1፣ 2012 ዓ.ም. ጀምሮ አዲስ ሰርቲፊኬሽን ለሚጠይቁ እና የFPIC ሂደት የሚጠይቁ ማናቸውንም ፕሮጀክቶች ወይም ተግባራት (ከላይ በተገለጸው መሠረት) ለማከናወን ዕቅድ ለሌላቸው የሥራ ክንውኖች መስፈርት 5.8.1 ተፈጻሚ አይሆንም።

2.2 የFPIC ሂደትን ማከናወን

ነፃ፣ ቀድሞ የሚሰጥ እና በቂ መረጃ ላይ የተመሠረተ ስምምነት (FPIC) ሂደት ከዚህ በታች የተጠቃለሉትን ስድስት እርምጃዎች መከተል አለበት።

_{ሥዕላዊ መግለጫ 1፦ ለነፃ፣ ቀድሞ የሚሰጥ እና በቂ መረጃ ላይ የተመሠረተ ስምምነት ሂደት እርምጃዎች}

ደረጃ 1 – ወሰን መለየት

1. እርሻው ለማልማት፣ ለመያዝ፣ ለመጠቀም ባቀደው መሬት ወይም ሀብቶች ላይ ፍላጎት ሊኖራቸው የሚችሉ ወይም በታቀደው ተግባር፣ ፕሮጀክት ወይም ማስፋፊያ ተጽዕኖ ሊደርስባቸው የሚችሉ ነባር ሕዝቦችን እና የአካባቢ ማህበረሰቦችን መለየት።

2. የታቀደው ተግባር፣ ፕሮጀክት ወይም ማስፋፊያ በሚከናወንበት ቦታ(ዎች) ወይም አካባቢ(ዎች) ውስጥ ወይም አቅራቢያ የሚገኙ እነዚህ ማህበረሰቦች በመሬት ወይም በሀብቶች ላይ ያላቸውን መብቶች፣ ይገባኛል ጥያቄዎች ወይም ፍላጎቶች (ለምሳሌ፦ የውሃ መብቶች፣ የውሃ መገኛ ቦታዎች፣ ወይም የማደን ወይም የደን ውጤቶችን የማውጣት መብቶች) መለየት።

3. በታቀደው ተግባር፣ ፕሮጀክት ወይም ማስፋፊያ ተጽዕኖ ሊደርስባቸው የሚችሉ ዓለም አቀፋዊ ወይም አገራዊ ባህላዊ፣ አርኪኦሎጂያዊ፣ ታሪካዊ ፋይዳ ያላቸውን ወይም ለነባር ሕዝቦች ወይም ለአካባቢ ማህበረሰቦች ባህላዊ እሴቶች ወሳኝ የሆኑ ማናቸውንም ቦታዎች፣ ሀብቶች፣ መኖሪያዎች እና መልክዓ ምድሮችን መለየት። ይህ መለያ ተግባር ከእነዚህ የአካባቢ ማህበረሰቦች ወይም ነባር ሕዝቦች ጋር በምናደርገው ግንኙነት መከናወን አለበት።

4. የታቀደው ተግባር፣ ፕሮጀክት ወይም ማስፋፊያ በደረጃ 1 (ለ እና ሐ) ላይ የተለዩትን መብቶች፣ ይገባኛል ጥያቄዎች ወይም ፍላጎቶች ሊቀንስ የሚችል መሆኑን መለየት። ይህ የሚሆነው በሚከተሉት ሁኔታዎች ነው፣ ነገር ግን በእነዚህ ብቻ አይገደብም፦

   1. በአሁኑ ጊዜ በማህበረሰቦች ወይም በማህበረሰብ አባላት ለዋና መተዳደሪያ ተግባራት እየዋለ ያለ መሬት ሲሆን።

   2. ማህበረሰቦች ወይም የማህበረሰብ አባላት ለአካባቢ ፍጆታ ወይም መተዳደሪያ ለሚጠቀሙባቸው ተፈጥሯዊ ሀብቶች ያላቸው ተደራሽነት ሲቋረጥ ወይም ሲቀንስ።

ደረጃ 2 – ዕቅድ፣ ምርምር እና ግምገማ

1. የመሬት እና የተፈጥሮ ሀብት አጠቃቀምን በተመለከተ ማህበረሰቡን ያሳተፈ ካርታ የማዘጋጀት ሥራ ማከናወን።

2. የፕሮጀክቱን ሊሆኑ የሚችሉ ተጽዕኖዎችን (አዎንታዊ እና አሉታዊ) መገምገም።

3. የካርታ ዝግጅቱን እና የግምገማ ሂደቱን ለመደገፍ ገለልተኛ የሆኑ ወገኖችን ማሳተፍ። ማህበረሰቦች በነፃ፣ ቀድሞ የሚሰጥ እና በቂ መረጃ ላይ የተመሠረተ ስምምነት (FPIC) ሂደት ውስጥ ሊደግፏቸው የሚችሉ ገለልተኛ ወገኖችን የመምረጥ መብት አላቸው። እነዚህ ገለልተኛ ወገኖች የአካባቢ መንግስታዊ ያልሆኑ ድርጅቶችን (NGOs) ሊያካትቱ ይችላሉ። ገለልተኛ ወገኖች የFPIC ሂደቱ እርምጃዎች እና ስምምነቶች መከበራቸውን እንደ ገለልተኛ አረጋጋጭ ሆነው ለማገልገል በFPIC ሂደቱ ውስጥ መሳተፍ አለባቸው።

4. ከነባር ሕዝቦች እና ከአካባቢ ማህበረሰቦች መብቶች ጋር የተያያዙ ተጽዕኖዎችን ለመፍታት አስፈላጊ ሆኖ ሲገኝ ፕሮጀክቱን እንደገና መግለጽ እና መከለስ።

ደረጃ 3 – ምክክር

1. ስለፕሮጀክቱ ተግባራት፣ ጥቅሞች እና ተጽዕኖዎች የሚገልጽ መግለጫ ለማህበረሰብ ተወካዮች ማቅረብ፤ አቀራረቡም ለማህበረሰብ ተወካዮች የትምህርት ደረጃ እና ለባህላዊው አውድ ተደራሽ እና ተገቢ በሆነ መንገድ መሆን አለበት።

2. ማህበረሰቡ ስለታቀደው ፕሮጀክት ተቀባይነት በውስጥ እንዲመካከሩበት ጊዜ መስጠት።

3. ማህበረሰቡ በፕሮጀክቱ ላይ መስማማት አለመስማማታቸውን (STOP / GO ውሳኔ) እና በምን ዓይነት ሁኔታዎች እንደሚስማሙ ለመወሰን ከማህበረሰቡ ጋር መመካከር።

4. በምክክሩ ወቅት በማህበረሰቡ የተነሱ ስጋቶችን ለመፍታት አስፈላጊ ሆኖ ሲገኝ ፕሮጀክቱን እንደገና መግለጽ እና መከለስ።

ደረጃ 4 – ድርድር

1. ማህበረሰቡ በፕሮጀክቱ ላይ ከተስማማ፣ የሥራ ሂደቱን ስምምነት ውሎች መደራደር። እነዚህ ውሎች በተጎዱ መሬቶች እና ሀብቶች ላይ ቀጣይነት ያለው ተደራሽነትን፣ ለመሬት እና ለሀብት አጠቃቀም ኪሳራ ከኪሳራው ጋር ተመጣጣኝ የሆነ ፍትሃዊ ካሳ፣ እና/ወይም ከፕሮጀክቱ ጥቅማጥቅሞች ፍትሃዊ ድርሻን ማካተት አለባቸው።

2. አስፈላጊ ሆኖ ሲገኝ፣ ማህበረሰቦች በድርድር ሂደቱ ውስጥ እንዲደገፉ የሕግ ምክር የሚያገኙበትን መንገድ ማመቻቸት። የሕግ ምክር እና የገለልተኛ ወገኖች ተደራሽነት በጠቅላላው የFPIC ሂደት ውስጥ፣ በተለይም በድርድር ምዕራፍ ወቅት ለማህበረሰቦች ዝግጁ ሆኖ የሚገኝ መሆን አለበት።

3. ማህበረሰቡ እና አባላቱ ቅሬታዎችን የሚያቀርቡበት እና እነዚህ ቅሬታዎች በአግባቡ ታይተው እልባት የሚያገኙበት የተስማሙበት ሥርዓት ያለበት፤ ማህበረሰቡን የሚያሳትፍ የክትትል እና የግጭት አፈታት ዕቅድ ማዘጋጀት።

ከዘላቂነት ያለው ግብርና ስታንዳርድ የተወሰዱ መስፈርቶች

ይህ ክፍል ለሬንፎረስት አሊያንስ ዘላቂነት ያለው ግብርና ስታንዳርድ (SAS) ብቻ ተፈጻሚ ለሆኑ ልዩ እና/ወይም ቀጣይነት ያለው ማሻሻያ መስፈርቶች ትግበራ ተጨማሪ ዝርዝሮችን ይሰጣል።

3. የሕፃናት ጉልበት ብዝበዛ እና የግዳጅ ሥራ ስጋት ካርታዎች

ከቀጣይነት ያለው ማሻሻያ መስፈርቶች 5.1.5፣ 5.1.6፣ 5.1.7 እና 5.1.8 ጋር የተገናኘ

እነዚህ የቀጣይነት ያለው ማሻሻያ መስፈርቶች ተፈጻሚ የሚሆኑት፣ በሬንፎረስት አሊያንስ የሕፃናት ጉልበት ብዝበዛ እና የግዳጅ ሥራ ስጋት ካርታዎች ላይ እንደተመለከተው፣ መካከለኛ ወይም ከፍተኛ የሕፃናት ጉልበት ብዝበዛ እና/ወይም የግዳጅ ሥራ ስጋት ሲኖር ነው። እነዚህ የስጋት ካርታዎች ለአንድ የተወሰነ አገር እና ዘርፍ ያለውን ስጋት የሚወስኑ ሲሆን በሚከተለው አድራሻ ሊገኙ ይችላሉ፦

https://www.rainforest-alliance.org/resource-item/data-sheet-for-child-labor-and-forced-labor-risk-maps/

ተጨማሪ ማብራሪያዎች በሚከተለው ድህረ-ገጽ ላይ ተሰጥተዋል፦

https://www.rainforest-alliance.org/in-the-field/manage-risk-with-the-rainforest-alliance-child-labor-and-forced-labor-sectoral-risk-maps/

4. የኑሮ ደመወዝ መነሻዎች በአገር

ከልዩ መስፈርት 5.4.1 ጋር የተያያዘ

በሬንፎረስት አሊያንስ ዘላቂነት ያለው ግብርና ስታንዳርድ መስፈርት 5.4.1 ላይ የተጠቀሱት የሚመከሩ የኑሮ ደመወዝ መነሻዎች (የማጣቀሻ እሴቶችን ጨምሮ) በዓለም አቀፍ የኑሮ ደመወዝ ጥምረት (GLWC) በኩል ይገኛሉ። የሰርቲፊኬት ባለቤቶች ማንኛውንም ሌላ በዓለም አቀፍ ደረጃ እውቅና ያለው መነሻ መጠቀም ይችላሉ።

በሁሉም ሁኔታዎች አመራር ወቅታዊ የሆነውን መነሻ መጠቀም እንዳለበት ማረጋገጥ ይኖርበታል። ይህ ብዙውን ጊዜ ባለፈው የቀን መቁጠሪያ ዓመት ውስጥ የሚገኝ መነሻ ነው።

የኑሮ ደመወዝ መነሻ ለሌላቸው አገሮች፣ የኑሮ ደመወዝ መነሻ እስኪገኝ ድረስ ለግምገማው ተፈጻሚ የሚሆነው ደመወዝ ጥቅም ላይ መዋል አለበት። በዚህ ሁኔታ፣ ተፈጻሚ የሚሆነው ደመወዝ ዝቅተኛው ደመወዝ ወይም በጋራ ድርድር ስምምነት (CBA) የተወሰነው ደመወዝ ሲሆን፣ ከሁለቱ ከፍ ያለ የሆነው እና ከመስፈርት 5.3.3 ጋር የሚጣጣመው ተመርጦ ይተገበራል።

ማሳሰቢያ፦ የኑሮ ደመወዝ ግምገማ በቡድን ሰርቲፊኬሽን ውስጥ ላሉ አነስተኛ እርሻዎች ተፈጻሚ አይሆንም።

ሌሎች መረጃዎች

ይህ ሰነድ ለመጀመሪያ ጊዜ የታተመበት ቀን (ቁ. 1.0)፦ ሐምሌ 1፣ 2014 ዓ.ም.

ሰርቲፊኬሽን ለማግኘት “አስገዳጅ” ተብለው የተጠቀሱ ሰነዶች መሟላት አለባቸው። “አስገዳጅ ያልሆኑ” ተብለው የተጠቀሱ ሰነዶች፣ አንባቢዎች መስፈርቶችንና ሌሎች አስገዳጅ ይዘቶችን እንዲረዱና እንዲተገብሩ ለመርዳት አስገዳጅ ያልሆኑ መረጃዎችን ይሰጣሉ።

የትርጉም ማሳሰቢያ

በትርጉም ውስጥ ባለው መረጃ ትክክለኛ ትርጉም ላይ ለሚነሱ ማናቸውም ጥያቄዎች፣ ግልጽነት ለማግኘት ይፋዊ የእንግሊዝኛ ቅጂን ይመልከቱ። በትርጉም ምክንያት የሚፈጠሩ ማንኛውም ስህተቶች ወይም የትርጉም ልዩነቶች አስገዳጅ አይደሉም እና ለኦዲት ወይም ለሰርቲፊኬሽን ዓላማዎች ምንም ውጤት አይኖራቸውም።

ይህንን ይዘት ከሬንፎረስት አሊያንስ ቅድሚያ የጽሑፍ ፈቃድ ውጭ ማባዛት፣ ማሻሻል፣ ማሰራጨት ወይም እንደገና ማተም በጥብቅ የተከለከለ ነው።

ተጨማሪ መረጃ?

የሬንፎረስት አሊያንስ ሰርቲፊኬት ለማግኘት እርዳታ ለማግኘት የደንበኛ ስኬት ቡድናችንን customersuccess@ra.org ላይ ያግኙ።

ስለ ሬንፎረስት አሊያንስ የበለጠ መረጃ ለማግኘት፣ http://www.rainforest-alliance.org ይጎብኙ፣ info@ra.org ላይ ወይም የሬንፎረስት አሊያንስ አምስተርዳም ቢሮ፣ De Ruijterkade 6፣ 1013AA Amsterdam፣ The Netherlands ያግኙን።

የግርጌ ማስታወሻዎች

1. የጊዜ ገደቡ የሚጀምረው ቅሬታው ከቀረበበት ቅጽበት አንስቶ ነው።  ↑

2. የሥርዓተ ጾታ ኮሚቴ/ኃላፊነት ያለበት ሰው የሚያስፈልገው ለእርሻ የሰርቲፊኬት ባለቤቶች (CHs) ብቻ ሲሆን፣ በጾታ ላይ የተመሰረተ ጥቃት እና በጾታ ላይ የተመሰረተ አድልዎ በሚከሰትበት ጊዜ በማስተካከያ ሂደቱ ውስጥ መሳተፍ አለበት።  ↑

3. አንድ ጉዳይ በኦዲት ወቅት በኦዲተር ከተለየ፣ እርማቶች መደረጋቸውን፣ የመነሻ ምክንያት ትንተና መከናወኑን እና የማስተካከያ እርምጃዎች መታቀዳቸውን የሚያሳይ ማስረጃ ኦዲቱ ከተጠናቀቀበት የመጨረሻ ቀን ጀምሮ በ 10 ሳምንታት ውስጥ (ከ 12 ሳምንታት ይልቅ) ለሰርቲፊኬሽን አካል (CB) መቅረብ አለበት። ለተጨማሪ መረጃ የሬንፎረስት አሊያንስ የሰርቲፊኬሽን እና የኦዲት ደንቦችን ይመልከቱ። ↑

4. አንድ ጉዳይ በኦዲት ወቅት በኦዲተር ከተለየ፣ የጉዳዩ ሙሉ ማስተካከያ (ደረጃ 4) ከሚቀጥለው ኦዲት በፊት እና ካለፈው ኦዲት የመጨረሻ ቀን ጀምሮ ቢበዛ በ50 ሳምንታት ውስጥ (ከ52 ሳምንታት ይልቅ) መጠናቀቅ አለበት። የማስተካከያ እርምጃ ዕቅዱ መተግበሩን የሚያሳይ ማስረጃ ከሚቀጥለው ኦዲት ቢያንስ 2 ሳምንታት በፊት ለሰርቲፊኬሽን አካል (CB) መላክ አለበት። ለተጨማሪ መረጃ የሬንፎረስት አሊያንስ የሰርቲፊኬሽን እና የኦዲት ደንቦችን ይመልከቱ። ↑